O venres 16 de abril o delegado da Xunta na Coruña, Gonzalo Trenor, visitou Noia para facer un chamamento veciñal en relación coas axudas convocadas para emendar e corrixir máis de 300 impactos paisaxísticos nos concellos galegos, á que destina o Goberno galego destina 1 millón de euros. Na compaña do alcalde Santiago Freire, convidou á cidadanía a tirar proveito destas subvencións pioneiras, encamiñadas a axudar aos propietarios a poñer a punto as vivendas e inmóbeis da súa propiedade, “co obxectivo de mellorar visualmente as súas edificacións e evitar un punto de impacto na contorna na que se asentan”.
O delegado da Xunta recalcou que “ata o 31 de maio, os particulares ou comunidades que desexen acollerse a esta liña de axudas poden presentar a súa solicitude, que cubrirá o 70% do importe global da proxecto de mellora paisaxística, que poderá incluír unha ou varias actuacións, e que, en todo caso, non superará os 3.000 euros por solicitude”. Segundo lembrou, ás persoas interesadas só se lles porá unha condición: a actuación deberá adaptarse aos criterios que fixan a Guía de cores e materiais de Galicia e a Guía de boas prácticas de caracterización e integración paisaxística.
Trenor animou aos veciños de Noia e de toda Galicia a levar a cabo este tipo de intervencións, axudándolles a asumir o custe que implica, e para o que “deberán seguir unha tramitación fácil e simple, posto que só deberán presentar unha pequena memoria explicativa da actuación, unha reportaxe fotográfica, a factura da actuación e a xustificación do pago”.