Proseguen en Porto do Son os traballos para poñer a punto as contornas urbanas e rurais, poñendo o foco na humanización, na mellora funcional e estética dos materiais e na accesibilidade. Ao fío disto, o Concello informou do remate dos traballos para acondicionar a rúa Petón de Baia no núcleo urbano do Son, situada nas proximidades do Colexio Público de Santa Irene.
O investimento total para as obras en Petón de Baia, moi demandadas pola veciñanza, foi de 48.280 euros.
Por outra banda, o Concello tamén puxo a punto a contorna da igrexa de Miñortos, onde conflúen o cruceiro e máis a casa reitoral e onde se procedeu a substituír o firme de asfalto por materiais de pedra tradicionais. Estes traballos en Miñortos abéiranse ao plan do Concello para recuperar e pór en valor as contornas históricas dos seus máis de cen núcleos rurais tradicionais, que ao longo dos pasados anos, segundo informou o Goberno local, foron obxecto de “obras bastante desafortunadas” que afectaron negativamente ao seu valor estético e histórico.