O Son celebra o Día da Terra facendo un chamamento pola sustentabilidade

O Concello de Porto do Son celebrou este 22 de abril o Día da Terra, e fíxoo en parte nas redes sociais, facendo un breve repaso polas presentes estratexias ambientais do ámbito local e, tamén, lanzando un chamamento á cidadanía para recordarlle a necesidade de facer fronte común fronte a un reto fundamental: impedir entre todas e todos o imparábel deterioro da diversidade, que está a desaparecer, por mor das actividades humanas insustentábeis, “a un ritmo sen precedentes”. De feito, lembraron fontes do Concello, “a día de hoxe hai preto dun milleiro de especies animais e vexetais que se atopan en risco de extinción”.

Aproveitando a celebración, o Goberno sonense tamén lembrou o seu compromiso no Pacto dos Alcaldes para o Clima e a Enerxía, un compromiso a través do cal o Concello fai propio o obxectivo da Unión Europea cara ao 2030 coa redución das emisións de CO2 en polo menos un 40%. Para conseguilo, dende o Consistorio traballan na aplicación de medidas de eficiencia enerxética e no incremento do uso de fontes de enerxía renovábel. Asemade, o Concello lembrou a súa aposta decidida polo turismo sustentábel, política que se materializa (entre outras moitas cousas) nas súas 16 rutas de sendeirismo.