O Concello de Dodro comunicou ó Servizo de Xestión Cultural da Dirección Xeral de Patrimonio Cultural e ó Servizo de Protección da Natureza (SEPRONA) a realización dunha corta de eucaliptos na área de protección integral de grao 1 do Castro de Lestrobe que causou o derrubo dos muros existentes na contorna, estragos na biomasa e restos da corta abandonados no propio camiño.
Ante as informacións do Distrito Forestal de que a corta non contaba co seu permiso e ante as evidencias de que tampouco ten permiso da DXPC, figurando a parcela con “propietarios descoñecidos” no servizo de xestión catastral, o Concello decidiu poñer en coñecemento das autoridades autonómicas este feito para que, en palabras do Goberno local, “dunha vez por todas non se volvan a repetir estas actuacións que atentan contra o Patrimonio Cultural de todos os veciños de Dodro e dos galegos”. E engadiu o Concello: “Se destruímos os bens patrimoniais tamén destruímos á nosa identidade como pobo”.
