O Concello de Dodro anuncia clases de reforzo educativo da ESO

O Concello de Dodro vén de lanzar clases de reforzo para tódolos mozos/as de ESO, empadroados ou que cursen estudos no termo. Esta iniciativa encádrase dentro do Programa de Conciliación Municipal que ten como obxectivo botar unha man á rapazada nos seus estudos con vistas á recta final do curso.

As clases de reforzo están previstas para o fin deste curso nos meses de maio e xuño en horario de 16:00 a 20:00 horas os luns, mércores e venres. Doutra banda tamén se porán en marcha clases no verán, nos meses de xullo e agosto, os luns, mércores e venres, de 9:00 a 13:00 horas.

A actividade levarase a cabo sempre e cando se cubran un mínimo de 10 prazas, e tódolos interesados poderán formalizar a súa inscrición do 6 ao 16 de abril, chamando ao 981 802 466 pola mañá.