Joaquín García, novo secretario xeral da Unión Intercomarcal Santiago-Barbanza de CCOO

O grupo de Comisións Obreiras para os nosos concellos ten nova directiva, encabezada por Joaquín García Gutiérrez, que vén de ser elixido novo secretario xeral na cuarta edición do Congreso da Unión Intercomarcal Santiago-Barbanza de CCOO, celebrada este 14 de abril no concello de Teo. Substitúe nesta responsabilidade a Carlos Pardo, que non se presentaba a reelección.

Joaquín García, o novo coordinador de CCOO para os concellos da nosa comarca

A de Joaquín García foi a única lista que se presentou e logrou o apoio maioritario dos delegados e delegadas; máis do 80% no caso da candidatura á secretaría xeral e case o 95% no caso da comisión executiva comarcal.

Canda García integran a nova dirección comarcal Laura Cereijo Míguez, José Francisco Mirás Pérez, Rosario Regueiro Rey, Jesús Rivas Paz, Ana M.ª Riveiro Currais, M.ª del Mar Blanco Gómez e Eduardo Brión Dorca.

Obxectivos

O novo secretario xeral fixa como prioridades “formar equipos, chegar a acordos e reforzar a colaboración entre os sindicatos comarcais para sermos máis fortes”. Canto á nova executiva, García salienta o “bo equipo de traballo que me acompaña”.