A Comisión pola Recuperación da Memoria Histórica da Barbanza vén de dar a coñecer que diversos integrantes da plataforma van acudir este xoves 22 de abril ao Consulado de Arxentina en Vigo para ratificar a documentación presentada na querela arxentina polos crimes de lesa humanidade cometidos reiteradamente durante todo o período da ditadura fascista en España.
Na visita ao Consulado estarán presentes membros das familias Abella, Lijó e Sieira, integrantes da Memoria Histórica da Barbanza e vítimas do franquismo. Irán acompañadas por Gus Gómez de CeaQua, compañeiro de cela e amigo do finado Chato Galante. Segundo lembra a comisión, en Galicia estímase que entre os xuízos sumarísimos e as persoas paseadas poderían estar afectadas máis de 5.000 familias.
E engaden: “Un estado que se di democrático non debería ter a estas alturas esta cuestión sen resolver. Seguimos sendo unha anomalía democrática en Europa cando temos que recorrer a un tribunal internacional para que se faga xustiza porque a española segue branqueando o franquismo”.
Segundo explican, “as familias que se sumaron a esta querela o único que queren dunha vez por todas despois de tantos anos de sufrimento é verdade, xustiza e reparación”.
A Comisión pola Recuperación da Memoria Histórica da Barbanza manifestou que “seguirá acompañado e asesorando a todas as familias que precisen a nosa axuda nestas cuestións”.
