O Centro Cultural Lustres Rivas inaugura este 9 de abril unha nova e relevante exposición, composta por máis de 30 obras por, segundo informa o Concello de Ribeira, “un repóker de creadores da nosa comarca”. Trátase, en detalle, de Manuel Ayaso, Alfonso Costa, Xoán Fernández, Soledad Penalta e Castelao. O título da mostra: 5 artistas do Barbanza. A iniciativa vén da man da Concellería de Cultura coa colaboración do Museo do Gravado de Artes e a Asociación Cultural Barbantia.
O acto inaugural está previsto para o venres ás 20 horas. As persoas interesadas en asistir poden inscribirse dende hoxe chamando ao Lustres Rivas (981 835 650) ou enviando un correo a
culturaefestexos@ribeira.gal indicando nome, apelidos, teléfono e nº de asistentes.
A exposición prolongarase ata o 29 de abril. Pódese visitar, de balde, de luns a venres de 10 a 14 e de 19 a 21 horas e os sábados de 11 a 14 horas. O aforo é limitado e o uso da máscara protectora, obrigatorio.