A festividade da Semana Santa foi o intre elixido polo Concello de Dodro para compartir con residentes e visitantes os seus moitos tesouros ambientais, paisaxísticos e patrimoniais. Fíxoo dando a coñecer os detalles de dúas rutas de sendeirismo: a das Aldeas de Riba de San Xián de Laíño, que percorre os núcleos de Rialiño, Paizal, Traxeito e Pexegueiro (saíndo da área recreativa da Fonte Primeiral); e máis a ruta Os Días Olvidados, que percorre os lugares nos que viviu o poeta local Eusebio Lorenzo Baleirón (1962-1986).
Os dous itinerarios están dispoñíbeis para móbiles en Wikiloc para a comunidade de camiñantes.
Sobre a primeira ruta, o Concello destaca a oportunidade que brinda para descubrir as numerosas fontes e regatos que abeiran e acompañan as devanditas aldeas, a maioría dos arroios confluíndo no Rego de Vigo que ten o seu nacemento nas Veigas de Pexegueiro.
O segundo percorrido lévanos por lugares de gran importancia para vida do poeta, polo que se presentan como un xeito inmellorábel de contextualizar o seu legado ao tempo que se amplía o coñecemento sobre as terras de Dodro. Grazas á ruta visitaremos enclaves como o Cruceiro de Gradín, o Lavadoiro de Tarrío, a casa do poeta en Tarrío, a aldea e o Pazo de Tarrío, a casa indiana de Brañeiro ou a Escola de Chenlo, onde estudou o escritor na súa nenez.
