Convocado o proceso para cubrir 104 prazas de auxiliares de Policía en 27 concellos, Noia incluída

Noia está entre os 27 concellos galegos incluídos na nova convocatoria da Xunta para cubrir prazas de auxiliares de Policía Local, unha cifra total de 104. Segundo fai saber Vicepresidencia, o procedemento será de oposición por quenda libre e permitirá, aos que o superen, ser contratados en réxime laboral temporal.

Os aspirantes deberán ter cumpridos os 18 anos e estar en posesión do título de graduado en educación secundaria ou equivalente, ademais de ter unha estatura mínima de 1,65 metros nos caso dos homes e de 1,60 no caso das mulleres.

O prazo de presentación de solicitudes será de dez días hábiles, e deberán presentarse, preferiblemente, na sede electrónica da Xunta de Galicia. Posteriormente publicarase no DOG a relación de persoas admitidas e excluídas e, na páxina web da Academia Galega de Seguridade Pública, as datas de celebración das probas selectivas e demais comunicacións dos procesos.

Os concellos que convocan as 104 prazas son A Cañiza, A Estrada, A Guarda, A Laracha, Bergondo, Betanzos, Cabanas, Cambados, Cangas, O Carballiño, Cedeira, Fene, Gondomar, Malpica de Bergantiños, Meaño, Miño, Mugardos, Noia, O Barco de Valdeorras, O Grove, Ortigueira, Poio, Salceda de Caselas, Sanxenxo, Tomiño, Vilagarcía de Arousa e Vilanova de Arousa.