A empresa alimentaria CONGALSA, con sede na Pobra do Caramiñal, vai dar un novo paso en materia solidaria, un ámbito de actuación no que a firma de produtos do mar é xa un referente. En concreto, informou de que este 1 de maio abre o prazo de inscrición para a sexta convocatoria da súa andaina solidaria. Novamente celebrarase de xeito virtual (por mor da situación sanitaria actual e tendo en conta o éxito da anterior entrega, o ano pasado, que se desenvolveu baixo un formato análogo e conseguiu mobilizar a unha chea de camiñantes).
Este ano, como novidade, as e os participantes poderán descargarse unha aplicación móbil na que rexistrarán todos os quilómetros que realicen e que, con posterioridade, a empresa converterá en euros para destinar a diferentes entidades benéficas da comarca do Barbanza.
A andaina solidaria desenvolverase entre o 1 e o 30 de xuño e haberá agasallos (a camiseta oficial da andaina) para todas as persoas que se inscriban con antelación, entre o 1 e o 17 de maio.
O devandito pode facerse xa a través da web deporticket.com.
CONGALSA marcouse como reto “superar a ampla participación do ano pasado no que tomaron parte na iniciativa un total de 620 persoas”.
Respecto da aplicación móbil que deberán empregar as e os participantes, a empresa indica que non se limitará a ser un acubillo no que rexistrar os quilómetros da andaina que leven a cabo, senón que tamén se poderá deixar constancia nela dos adestramentos de cada quen.
Tres euros de cota solidaria
Do mesmo xeito que o ano pasado, a andaina está aberta non só aos traballadores da empresa, senón tamén aos seus familiares, amigos, a representantes de entidades colaboradoras e a toda aquela persoa que queira colaborar, con independencia da súa localización xeográfica.
CONGALSA explica que ao completar o formulario de inscrición, as e os participantes deberán abonar unha cota solidaria de tres euros. Porén, se se desexa colaborar sen realizar quilómetros tamén se pode efectuar a doazón a través do dorsal 0.
Unha vez inscritas, as persoas participantes recibirán un correo electrónico co seu dorsal, a ligazón para descargar a aplicación móbil e un formulario ao que poderán remitir as súas fotografías co dorsal.
A compañía da Pobra do Caramiñal realizará un vídeo conmemorativo da iniciativa, con imaxes das e dos camiñantes, que divulgará en diferentes canles corporativas.
