A portavoz de Pesca do BNG, Rosana Pérez, rexistrou unha batería de iniciativas parlamentarias para reclamar “axudas compensatorias” para os mariñeiros mentres dure a veda do polbo (do 1 de maio ao 5 de xullo), unha especie cuxa captura representa o 70% dos ingresos do sector. Segundo fixo saber Pérez, ao feito de ser unha especie crucial para a economía de mancheas de familias hai que sumar as consecuencias da pandemia e as restricións. “Isto fai necesario compromiso da Consellería do Mar para establecer axudas compensatorias para os mariñeiros mentres dure a veda desta especie”, dixo.
A deputada explicou que no pasado mes de outubro, o Grupo Parlamentar do BNG trasladaba ao Parlamento galego, a través de diferentes iniciativas, a grande preocupación de moitos mariñeiros tras “a nefasta campaña do polbo do pasado verán con apenas o 10% das capturas dos últimos anos”. Pechado o ano 2020 e a día de hoxe, asegura a deputada, os datos “son moi alarmantes”. As vendas nas lonxas galegas diminuíron un 60%, a facturación fíxoo nun 40% e das máis de dúas toneladas capturadas no 2019, apenas foi capturada una no 2020.
