Ao abeiro do programa Dodro Sostible, impulsado polo Concello para fomentar entre a poboación hábitos respectuosos co medio ambiente, poñendo o foco nas novas xeracións, vén de levarse a cabo unha iniciativa colectiva para limpar de cabichas e outros residuos a contorna do Pavillón Polideportivo e outros lugares do concello.
Participaron alumnas e alumnos de quinto de Primaria e terceiro de Secundaria do CPI Eusebio Lorenzo Baleirón. A iniciativa formou parte das accións Limpa Dodro de cabichas para concienciar á cidadanía da contaminación que xeran estes residuos plásticos, que tardan décadas en degradarse. A actividade, amais de para sensibilizar a participantes e veciñanza sobre a importancia dunha correcta xestión dos refugallos, serviu tamén recoller os restos de botellas e outros desperdicios deixados pola xente que decote participa en botellóns ao carón do pavillón. O Concello aproveitou para facer un novo chamamento ao civismo en relación con estes feitos, que son preocupantes en calquera época do ano e que nestes tempos de crise sanitaria son aínda de meirande risco.
