A Feira do Libro de Rianxo celebrarase entre o 22 e o 25 de xullo

A Federación de Librarías vén de compartir nas redes o calendario das feiras do libro para esta tempada de primavera e verán, un período de actividade polas alamedas e os centros urbanos das nosas cidades e vilas que se estenderá dende o 23 de abril até o 28 de agosto.

A primeira das citas, que como todas as demais desenvolverase baixo as máis estritas medidas de seguridade, é en Ferrol, na praza da Constitución, até o 25 de abril. Logo serán as quendas de Compostela (dende o 8 de maio até o 17, na Alameda), do Porriño (Dende o 27 de até o 30 de maio, na rúa Ramón González), de Ourense (no paseo das Burgas do 2 ao 5 de xuño), de Redondela (do 17 ao 20 de xuño, na Alameda), de Vigo (dende o 1 até o 10 de xullo no Príncipe) e de Ponteareas (na praza Maior, do 15 ao 18 de xullo).

O itinerario de xullo rematará simbolicamente en Rianxo, onde se vai desenvolver a feira entre os días 22 e 25 de xullo, coincidindo a finalización do acontecemento libreiro co Día da Patria.

Polo que respecta a agosto, a xira será a seguinte: primeiro os Xardíns de Méndez Núñez da Coruña, entre o 1 e 10 de agosto; logo os xardíns Noriega Varela de Viveiro, entre os días 13 e 16; a continuación a praza Conde do Fontao de Foz, do 19 ao 22; e para rematar a rúa do Cardeal de Monforte entre os días 25 e 28 de agosto.