A Deputación da Coruña puxo en marcha hoxe un novo programa piloto de prevención
da ludopatía, que se impartirá nos centros educativos da provincia, coa colaboración
de AGALURE, entidade de referencia no tratamento da adicción ao xogo.
O programa desenvolverase durante este ano en 18 centros educativos de ESO, entre
os cales se atopan o Eusebio Lorenzo Baleirón de Dodro, o Cernadas de Castro de
Lousame e o IES Félix Muriel de Rianxo. A iniciativa está centrada especialmente nas
apostas deportivas e o xogo online, en auxe nos últimos tempos e, segundo datos da
entidade, o máis habitual entre a mocidade.
O presidente provincial, Valentín González Formoso, visitou hoxe xunto á deputada de
Benestar Social, Ana Lamas, a sede de AGALURE para presentar o programa co que
pretenden “concienciar á mocidade dos importantes riscos que entrañan estas novas
modalidades de xogo”.
Por último, a entidade herculina, AGALURE, comentou que a “adición ás maquinas
tragamoedas descendeu nos últimos anos, máis as apostas deportivas e o xogo online
experimentou un notable incremento, polo que demandamos ás autoridades un
control estrito para os sectores vulnerables, como son os menores e as persoas que
teñen autoprohibido o xogo”.
