A Deputación da Coruña destina máis de 2 millóns de euros á mellora e profesionalidade do sector. En concreto, 1.263.636 euros distribuiranse á xestión de asociacións, mancomunidades e consorcios turísticos, cos que se pretende aumentar a calidade e a organización de actividades. Os 787.812 euros restantes ofreceranse para a contratación de persoal técnico para os concellos.
O deputado de Turismo, Xosé Regueira sinalou que “neste ano e, coa situación que estamos a vivir, as dúas liñas de subvencións son aínda máis necesarias, xa que suporán unha inxección económica de gran valor para as urxencias que se impuxeron despois da aparición da COVID-19”. De feito, tanto os distintos entes de xestión como os concellos, precisan adaptar o sector a esta nova situación e ofrecer destinos de calidade, seguros e saudábeis.
Na resolución do BOP ven establecido que a concesión do 1.263.635€ euros destinarase a 16 entidades. Entre elas destacan asociacións de concellos como os do Camiño da Ría de Muros-Noia. No referente ás axudas para a contratación de persoal, a convocatoria permite que 56 concellos de menos de 50.000 habitantes poidan contar con especialistas no sector para a xestión dos novos retos post-pandemia. Segundo Xosé Regueira, “a profesionalización das áreas municipais é tamén un dos obxectivos da área de Turismo da Deputación da Coruña, que aposta claramente por unha oferta de calidade”.
