A Comisión pola Recuperación da memoria Histórica da Barbanza (CRMHB) vén de anunciar unha serie de actos polo día da República que terán lugar o sábado día 17 ás 18:00 horas no Monumento ás Vítimas do Franquismo no Confurco (Lousame).
A xornada terá como protagonista o traballo realizado por Aurora Marco, que será nomeada como Republicana da Honra deste ano. A doutora en Filosofía e Letras, catedrática de Lingua e Literatura Galega e investigadora destaca sobre todo polo seu papel como muller comprometida coa visibilización do traballo das mulleres ao longo da historia e a represión que sufriron durante o Franquismo.
No acto tamén se realizará unha ofrenda floral e contarase coa participación musical de Barahúnda e Bety Pillado. A homenaxe levarase a cabo baixo as medidas de seguridade establecidas pola autoridade por mor da COVID-19.
