SumaRibeira demanda un regulamento que garanta a transparencia e o acceso aos datos públicos do Concello

Xurxo Ferrón, voceiro de SumaRibeira

SumaRibeira vén de anunciar que vai reclamar no vindeiro pleno municipal a creación “dun regulamento que garanta a transparencia e o acceso á información pública do Concello, a través dunha comisión na que estarán integrados todos os grupos políticos e na que se terán en conta as achegas de veciños e veciñas”.

Segundo fai saber a agrupación, a proposta en o obxectivo de “corrixir a continuada e pertinaz mala praxe” do Goberno local respecto da publicidade de información relevante para a cidadanía, no relativo tanto á actividade municipal como á acción de Goberno.

O seu concelleiro, Xurxo Ferrón, SumaRibeira considera “fundamental” unha iniciativa destas características para “pór fin á opacidade do Executivo ante temas tan importantes como a información sobre as axudas para a reactivación económica e social do Concello, o Plan PEL-Reactiva, ou o novo regulamento de uso de aeronaves pilotadas por control remoto, en período aínda aberto á presentación de alegacións.

Sobre o PEL-Reactiva, a agrupación critica que na páxina web municipal só estea publicado o importe de cada axuda concedida e o número de rexistro e de expediente, “mais non a identidade das empresas beneficiarias”, explican.

Sobre o novo regulamento de aeronaves pilotadas por control remoto, SumaRibeira denuncia “que nin se lle facilitou ao veciño que o requiriu publicamente a través da páxina de Facebook Cambiemos Ribeira e que pediu aos partidos que solucionaran esta ausencia de información; nin se atopa exposto na páxina web municipal”. A agrupación engade que segundo o Boletín Oficial da Provincia do 1 de Marzo, unha vez aprobado, está en fase de exposición publica durante 30 días para poder presentar alegacións. “Na data na que se rexistra esta proposición”, explica Ferrón, “xa transcorreron once días dos trinta concedidos e segue sen estar público e accesíbel na Rede”.