Rianxo acorda impulsar os obxectivos de desenvolvemento sustentábel da Axenda 2030

O pleno ordinario do Concello de Rianxo correspondente o mes de febreiro, celebrado este xoves 26, aprobou impulsar a Axenda 2030. O acordo, aprobado por maioría coa abstención do PP, implica o compromiso da Corporación de Rianxo para asumir o contido e obxectivos da axenda mundial polo desenvolvemento sustentábel como “guieiro da actuación municipal no período 2020-2030”.

Isto abrangue a creación dun grupo de traballo cos grupos locais para elaborar a folla de ruta rianxeira “cun plan de acción concreto que permita executala” e que abra vieiros para compartila con outras administracións e permitir a implicación e participación da cidadanía.

A Axenda 2030, como lembraremos, é un marco colaborativo mundial impulsado en orixe por dous centenares de países e que xunta e integra 17 Obxectivos de Desenvolvemento Sustentábel de Nacións Unidas para seren cumpridos para o ano que se especifica na folla de ruta común. Perséguese a igualdade entre as persoas, a protección do medio ambiente e asegurar a prosperidade. Foi definido como un documento decisivo para non deixar a ninguén atrás e para garantir a protección medio ambiental.

Máis mocións aprobadas: celebración do 8 de marzo

No pleno do 26 de febreiro tamén se acordou apoiar a celebración do 8 de marzo para “expresar e recoñecer as convocatorias do feminismo galego auto-organizado que neste 2021 colocan no centro do debate os coidados e as consecuencias para as mulleres galegas do sistema económico, social e político no que vivimos, agravadas polo impacto da pandemia da COVID-19”.

Contra a Lei de Saúde de Galicia

A instancias do PSOE, pediuse o rexeitamento á modificación da Lei de Saúde de Galicia proposta no Parlamento de Galicia, e instar ao Goberno da Xunta de Galicia a “iniciar una reforma da dita Lei en consenso con todas as forzas políticas con representación parlamentaria, axentes sociais, sociedades científicas, representantes das administracións locais e do ámbito xurídico galego”. Esta reforma, segundo explicou previamente o grupo socialista, “estará orientada a mellorar, de ser necesario, os aspectos que poidan contribuír a optimizar o sistema legal que sexa preciso pero sen implantar medidas de restricións de liberdades e dereitos individuais e facelo, ademais, de acordo coas valoracións sanitarias nos aspectos en que sexa necesario”.

Esta moción foi aprobada por maioría co voto en contra do PP.

Rebaixa IVE salóns de peiteados

O PP presentou unha moción para pedir a rebaixa no IVE ao 10% nos salóns de peiteado. Foi aprobada por maioría coa abstención do PSOE. Fíxoselle saber ao Partido Popular que previamente, durante o mandato do partido no Goberno central, votara en contra dunha iniciativa semellante aprobada en 2014 no pleno do Concello.

Apoio aos traballadores e traballadoras do Consorcio, A Galiña Azul

O pleno votou por unanimidade apoiar os traballadoras e traballadores do Consorcio Galego de Servizos de igualdade e Benestar na busca dunha solución dialogada que teña en conta os dereitos de persoas que acumulan até 14 anos de traballo no Consorcio Galego de Servizos de Igualdade e Benestar. Deuse lectura do escrito presentado polas traballadoras.

Outras mocións aprobadas

A instancias do PP pediuse a rebaixa da luz e incluíuse o apoio a unha tarifa eléctrica galega, sendo aprobada coa abstención do PSOE.

Tamén se acordou solicitar o traspaso de competencias sobre o Dominio Público Marítimo para que que “sexa xestionado desde Galiza”. Presentada polo PP, a moción aprobouse por unanimidade.

Igualmente apoiouse unha moción de Rianxo en Común para axudar aos estragos causados polo xabarín.