Rianxeira alcanza a neutralidade en CO2 como parte do seu compromiso ambiental

A compañía JEALSA vén de compartir algúns dos seus novos fitos en materia de sustentabilidade e compromiso ambiental. Estes logros teñen relación directa con Rianxeira, a gama de conservas da empresa radicada en Boiro, un dos seus buques insignia no mercado e un referente no sector en materia de sustentabilidade e saúde. Segundo informou JEALSA, a marca vén de acadar a neutralidade en carbono grazas a que as emisións xeradas no seu proceso de produción compénsanse coa enerxía obtida pola propia compañía, por medio de parques eólicos propios e participados.

En concreto, a electricidade xerada en 2020 por estas instalacións (476 GWh) equivale ao consumo de electricidade de 117.618 fogares, permitindo compensar as emisións de CO2 das súas fábricas. Ademais, informou JEALSA, “estas instalacións evitaron a emisión de 433.756 toneladas de CO2 á atmosfera, o que corresponde ao consumo anual de 143.866 coches novos, se supomos que estes percorren 25.000 quilómetros anuais”.

Juan Carlos Cordeiro, director da marca, asegura que este fito supón unha nova demostración do propósito de Rianxeira, da súa total orientación á sustentabilidade, e como este se aplica a todos e cada un dos aspectos do proceso produtivo”.

En palabras de Ángeles Claro, directora de sustentabilidade de JEALSA e de We Sea, o programa de RSC da compañía, “apostamos polas enerxías limpas nun exercicio de máximo compromiso co medio ambiente, que vaia máis aló do estándar e que nos permita xerar un impacto positivo por medio das nosas distintas marcas”.

Rianxeira alcanza este novo logro despois de situarse como a marca do sector mellor valorada en materia de sustentabilidade polos consumidores, segundo un estudo recente desenvolvido pola consultora independente Hamilton Global Intelligence. Este compromiso reflíctese integramente a nivel de produto, por exemplo no de feito que todos os atúns e bonitos que conforman o catálogo de conservas de Rianxeira sexan “100% sustentábeis” e “procedan de métodos de pesca responsábeis certificados, como o selo azul de MSC, o estándar das súas características máis esixente do mercado”. .