A Deputación da Coruña anunciou este 11 de marzo a integración formal do centro de coworking de Boiro, o Lab Barbanza, na Rede de de Espazos de Traballo Colaborativo da entidade provincial. Estes e ouros detalles foron achegados polo presidente Valentín González Formoso durante a súa visita ao concello boirense, onde destacou a necesidade de “aproveitar o potencial industrial de Galicia e apostar pola innovación”, e onde salientou a aposta por “un modelo único de traballo e emprendemento” que propón a Rede Provincial de Coworking, á que tamén se adheriron, dende diferentes sectores, Oleiros, Brión, Ames, Carballo, Moeche e A Capela.
O alcalde José Ramón Romero explicou que Lab Barbanza, espazo de traballo centrado na transformación tecnolóxica e na evolución dos sectores tradicionais da comarca, será “unha ferramenta de apoio para as persoas emprendedoras do noso municipio e da comarca e un lugar no que se poidan desenvolver grandes proxectos”.
Amais, o presidente e o alcalde presentaron, xunto con Daniel García, presidente da Asociación Boirense de Empresarios, a campaña Todxs Somos Boiro de apoio ao comercio local, co-financiada pola Deputación e o Concello.
Na visita ao Lab Barbanza tamén participaron os deputados provinciais Blas García e Sandra González.
O centro boirense está situado no Polígono de Espiñeira, propiedade do Concello, e conta con 283 metros cadrados de superficie útil distribuídos en 5 oficinas, sala de recepción, servizo de reprografía e sala para reunións, xestión e presentación de proxectos, así coma aseos e zonas comúns.
O inmóbel dispón ademais de xardíns e zona de estacionamento exterior, insonorización, calefacción central de alta eficiencia enerxética, iluminación con LED de baixo consumo, conexión de telefonía e fibra óptica en todos os espazos e accesibilidade total para persoas con mobilidade reducida.
González Formoso destacou que “Galicia necesita facer unha lectura clara das súas potencialidades industriais e necesita apostar pola innovación e por este pequeno tipo de nichos onde o coñecemento teña as sinerxías garantidas e onde o coñecemento teña a posibilidade de intercambiar ideas e experiencias que fagan impulsar proxectos empresariais que hoxe son pequenos pero o día de mañá poden estar consolidados no seu mercado”.
Pola súa banda, o alcalde José Ramón Romero explicou que “queremos que Lab Barbanza, ao igual que o resto de espazos de traballo colaborativo rede provincial, sexa unha ferramenta de apoio para as persoas emprendedoras do noso municipio e da comarca e un lugar no que se poidan desenvolver grandes proxectos”.
O concelleiro de Comercio e Consumo, Marcos Fajardo, subliñou que os últimos datos oficiais de emprego din que na comarca do Barbanza “só Boiro planta cara á crise”. E engadiu: “No 2020 fixéronse na localidade 4.480 contratacións relacionadas co sector industrial cando en 2019 foron 2.781”, apuntou.
Para pór en funcionamento este novo espazo de traballo, o concello de Boiro e a Deputación da Coruña asinaron un convenio de colaboración que contou cun orzamento de 98.687,50 euros para dinamización e titorización dos proxectos deste coworking, dos cales un total de 75.000 euros procederon do Plan de Emprego Local (PEL) da Deputación da Coruña, é dicir, o 76% do total.
10 proxectos xa en fase de aceleración
O programa de formación e aceleración Emprende-LAB Barbanza, que contou tamén coa colaboración da Asociación Boirense de Empresarios (ABE), comezou en setembro dando acubillo a 18 emprendedores da comarca. Destes 18 proxectos empresariais, un total de 10 foron seleccionados para pasar á segunda fase tras un DemoDay. Nesta xornada os proxectos participantes presentaron o seu traballo fronte a un xurado que os avaliou e seleccionou aos dez que pasarían á segunda fase do programa, o de aceleración.
Entre as iniciativas emprendedoras seleccionadas están Fortem Hub, unha proposta formativa para persoas de colectivos vulnerábeis; Laflora, unha iniciativa para a produción musical e as iniciativas emprendedoras; Orenpay, que desenvolve unha aplicación móbil para o sector hostaleiro que permite ver a carta ou facer un pedido mediante códigos QR; E-commerce, de regalos personalizados, NadadeNada, un proxecto téxtil; Arándanos Barbanza, unha iniciativa de agricultura ecolóxica; Esteos, un proxecto de tecnolóxico baseado no Internet das Cousas para simplificar os procesos produtivos das empresas e minimizar custes; e GastroLab Arousa,
unha escola de cociña cun espazo gastronómico orientado á formación e ás
demostracións culinarias en directo.
Tamén participan Naturalmente, unha proposta de terapias alternativas para o coidado usando produtos naturais; e Fashion School, unha escola de corte e confeccións online.
