A Asociación Boirense de Empresarios (ABE) presentou este 11 de marzo unha nova campaña para facer unidade (sen barreiras, sen exclusións e sen desigualdades) a prol da recuperación económica e social do termo municipal. Na iniciativa, cuxo nome fala ás claras do seus obxectivos, Xuntxs Facemos Boiro – Todxs Somos Boiro, as protagonistas non son outras que as empresas da patronal boirense e as persoas con nomes propios que as impulsan e se esforzan porque saian adiante, mesmo no medio dun contexto tan complexo como o que estamos a vivir.
Segundo informou a ABE na presentación, “dende hoxe e durante tres meses os 12 rostros dos doce socixs que representan ao colectivo nesta iniciativa van estar moi presentes na vida diaria da veciñanza de Boiro, xa que coa primeira parte desta campaña serán 90 en total as pancartas que nas rúas nos recordarán cal é a contribución de cada empresaria e de cada empresario á nosa vida diaria”. Deste xeito, engadiu a patronal, “as pancartas contan de xeito moi persoal como entre todas e todos facemos Boiro”.
As e os protagonistas
1. Manolo – Brico pestañas – 30 anos enmarcando os teus soños.
2. Ana Belén – Farmacia Ortopedia Torrente – 4 anos cerca de vós.
3. Alicia – Frutas Reyjosa – 50 anos sendo a túa horta.
4. Julia – Bives Tour – 10 anos cumprindo os teus soños
5. Fernando – Inmobiliaria Mirabén – 15 anos atopando teu lugar
6. Lucía – Autos R. Outeiral – 75 anos sumando kms xuntos
7. Angel – Cetarea A. Mar – 22 anos achegando sabor
8. Oscar – España y Fernandez – 42 anos construíndo fogares
9. Suso – 27 anos facéndote bailar
10. Jesús – 11 anos compartindo xantares
11. Gerardo – 42 anos fasquiando o futuro
12.Alex- Deportes SR balón – 39 anos manténdote en forma
Vertente online
En paralelo á vertente física, ABE impulsou unha sección online na que ademais das publicacións en redes das fotografías dos protagonistas lanzarase un vídeo que será, en palabras da entidade, “o punto forte da parte mais dixital da campaña”.
O vídeo xira en torno á interconexión da vila e os seus habitantes co comercio e empresas que lle dan vida e que se lanzará a finais deste mes.
A campaña está financiada pola Deputación de A Coruña e colabora o Concello de Boiro.
Na presentación estiveron presentes (entre outros) o presidente da patronal, Daniel García, o alcalde, José Ramón Romero, e máis o presidente da Deputación, Valentín González.
