Mobilidade total en Galicia desde o luns salvo nun concello


Desde este luns 29 ás 00:00 horas e coincidindo cos primeiros días de Semana Santa, os galegos poderán moverse con liberdade por toda Galicia sen peches perimetrais a excepción do concello de Beade en Ourense que continúa en nivel máximo de restricións. Así o decidiu a Xunta de Galicia tras a reunión do subcomité clínico deste venres na que se acordou baixar o concello de Maside ao nivel alto.

Beade convértese así no único concello co nivel de restricións que esixe o peche perimetral do municipio, a hostalería só aberta para servizo a domicilio e recollida e prohibe as reunións de non conviventes. O outro concello que se atopaba no nivel máximo, Maside, pasou ao alto uníndose a outros nove municipios, entre os que se manteñen os pontevedreses de Sanxenxo e Baiona.