A plataforma de comercio electrónico Mercarianxo, impulsada pola ARE (Asociación Rianxeira de Empresarios) en colaboración co Concello, vén de compartir unha importante novidade ao seu servizo de venda online e distribución segura de produtos e servizos dos establecementos locais. Trátase dun servizo de bicicletas de paseo en aluguer impulsado por RodaRianxo para favorecer a mobilidade sustentábel e saudábel e, por suposto, para permitir que residentes e visitantes desfruten da longa listaxe de espazos naturais e urbanos de lecer cos que conta o termo municipal rianxeiro. Ofrécense tres tipos de vehículos: bicicletas clásicas, bicicletas para nenos e cadeiras portabebes.
Segundo informan dende Mercarianxo, as persoas interesadas poden anticiparse á activación formal do servizo facendo reservas ou mercando os tíckets dende a plataforma de ecommerce, ou ben fisicamente no punto de recollida nas dependencias de Old Memories Tattoo Studio.