Galicia demanda que os mariñeiros poidan exercer o seu dereito a voto con todas as garantías cando haxa citas electorais

30 Marzo 2021

A conselleira do Mar, Rosa Quintana, visitou hoxe a sede viguesa da organización non gobernamental (ONG) internacional de axuda aos mariñeiros Stella Maris, o Apostolado do Mar, onde mantivo un encontro cos seus responsables. Nesa xuntanza a titular de Mar avogou pola colaboración na defensa dos dereitos dos mariñeiros, como o relacionado con que poidan exercer plenamente o seu dereito a voto cando hai citas electorais, ou a mellora das condicións de vida a bordo.

En relación coa demanda de mecanismos que posibiliten aos tripulantes de buques pesqueiros e mercantes exercer o seu dereito a voto cando se celebren comicios, a representante do Executivo galego lembrou que Galicia leva tempo traballando para lograr avances neste eido. Nesta liña, indicou que o Parlamento galego conta con iniciativas en marcha para pedir ao Goberno central que incorpore na lei electoral un sistema que permita a estes profesionais votar con todas as garantías aínda que se atopen embarcados.

A conselleira do Mar coincidiu cos responsables de Stella Maris en que a normativa actual conta con moitas limitacións neste sentido pero garantiu que a Xunta vai seguir traballando co obxectivo de rematar con esta situación anómala e que os mariñeiros poidan votar coma calquera outro cidadán. Ademais, lembrou que os avances tecnolóxicos acadados nos últimos anos deberían favorecer o establecemento dun mecanismo que garanta o exercicio dun dereito fundamental de todos os galegos.

Rosa Quintana tamén trasladou aos representantes da organización que a Consellería do Mar leva tempo traballando noutra das súas demandas, a mellora das condicións da vida a bordo dos tripulantes. Neste sentido, a titular de Mar incidiu en que Galicia defendeu desde o primeiro momento que o futuro Fondo Europeo Marítimo e de Pesca debe incluír apoios para a realización de melloras a bordo dos buques e tamén a construción doutros novos para mellorar a súa habitabilidade.

Trátase dunha cuestión, engadiu, transcendental tamén para acadar a remuda xeracional no sector pois a mellora das condicións de vida a bordo é un dos aspectos prioritarios para que a xente nova vexa o mar como unha opción laboral atractiva con melloras en cuestións como as comunicacións con terra para paliar en boa medida as longas estadías en alta mar.

A conselleira do Mar agradeceu aos responsables de Stella Maris o seu labor na defensa dos intereses do mariñeiros nos 300 portos e 41 países nos que está presente e avogou por traballar da man co obxectivo de facer realidade as reivindicacións dos profesionais do mar e acadar a mellora das súas condicións de vida así como o exercicio dos seus dereitos.

Outros artigos

Publicidade

Revista en papel

Opinión

“Legislatura serena y estable”. José Castro López

“Legislatura serena y estable”. José Castro López

El inicio de la duodécima legislatura en el Parlamento gallego reconcilia con la política,al menos por unos días. Sin entrar en los detalles de la liturgia protocolaria del acto, haydos imágenes relevantes que captaron las cámaras y publicaron los medios impresos...

“Cadaquén coa súa idea”. Luís Celeiro

“Cadaquén coa súa idea”. Luís Celeiro

Fóronse onte pola madrugada e arestora aínda non chegaron. Montaron nun avión para ir a “non seionde” e, despois, un tren de longo recorrido levaríaos a outro aeroporto,  para seguir o seuprograma de turismo ofertado por unha das máis importantes axencias de turismo...