En Rianxo o Concello pon a punto as praias e o paseo marítimo

O Concello de Rianxo, a través da área de Obras e Servizos Municipais, realizou estes días unha serie de traballos de limpeza pormenorizada nos areais do termo municipal. Na praia da Torre, por exemplo, procedeuse a separar os residuos orgánicos dos refugallos plásticos para o seu correcto procedemento.

Polo que respecta aos areais de Porrón e Porto, fíxose un exhaustivo labor para ceibalas do material deixado ao longo deste inverno polas mareas e os temporais. Estes traballos de limpeza tamén se estenderon esta semana á praia da Torre. A estas tarefas cómpre engadir as reparacións levadas a cabo polos operarios municipais no paseo marítimo de Rianxo, substituíndo lousas rotas ou en mal estado por outras novas.