Amicos convoca aos concellos, as asociacións empresarias e aos cidadáns da nosa comarca para celebrar o Día Mundial do Autismo

22 Marzo 2021

Este 2 de abril conmemórase o Día Mundial da Concienciación sobre o Autismo e na asociación comarcal Amicos queren darlle á celebración “unha visibilidade especial”, en boa medida polas oportunidades que pon en xogo para mostrar os importantes obstáculos que teñen no camiño da inclusión os colectivos TEA e, tamén, para xuntarmos forzas e tiralos abaixo. Asemade, é unha xornada para achegar coñecemento real sobre este trastorno: “Dende Amicos queremos que todas as persoas se sumen ao azul que é a cor que representa o autismo para que todos contribuamos a súa normalización e derrubemos as barreiras sociais en torno a este espectro”. Deste xeito presentou o programa de actividades Digna Iglesias, vicepresidenta da asociación, que, para a difusión da campaña puxo en marcha varias iniciativas protagonizadas por Juan Pombo, membro de Amicos con trastorno autista.

A axenda será unha axenda de implicación e colaboración.

Así, contarase por exemplo coa adhesión dos Concellos da nosa comarca, que porán pancartas azuis nas instalacións municipais. Deste xeito, os Consistorios de Noia, Porto do Son, Ribeira, Boiro, A Pobra e Rianxo farán gala nas súas fachadas dos lemas de inclusión da iniciativa.

Por outra banda, a idea de Amicos é conseguir a máxima cooperación dos comercios, negocios e establecementos de restauración da zona, co fin de que “vistan os seus escaparates de azul” dende hoxe até o 2 de abril. E non só iso, senón que o resultado visual destes escaparates engalanados tamén sexa compartido nas redes sociais e que estas contribucións leven incluídas as etiquetas de Amicos, “así poderemos elixir un escaparate gañador, que levará un premio feito polas persoas da asociación”, explicouse este luns 22 na presentación da iniciativa.

As entidades empresariais que participan finalmente son: a Asociación Boirense de Empresarios (ABE); a Asociación de Empresarios de Ribeira; a Asociación de Empresarios, Comerciantes e Autónomos da Pobra; a Asociación Rianxeira de Empresarios (ARE); Noia Histórica e, tamén, Deloa: Sar, Barbanza, Muros e Noia.

Na rolda de prensa estiveron presentes o presidente da Asociación de Empresarios de Riveira, Francisco Martínez Gude; o representante da Asociación de Empresarios de A Pobra, Primitivo Caramés; e Tomás Estévez, xerente da Asociación Boirense de Empresarios. “Queremos aportar o noso graniño de área”, aseguraba Primitivo.

Como obsequio aos comercios participantes, entregaráselles unha Guía de Pictogramas imprimíbel para que poidan adaptar cognitivamente os seus establecementos para todas aquelas persoas que teñan dificultades de compresión e comunicación.

Xoán España, director xeral de Amicos, explicaba que a campaña ten unha vertente de visibilización e outra parte institucional para que os comercios adapten as súas instalacións de maneira cognitiva para que as persoas que necesitan apoios poidan telo máis doado: “Queremos conseguir un mundo máis inclusivo”, concluía.

A parte desta suma en azul, estes días farase visíbel a realidade do autismo na web de Amicos e nas súas redes sociais explicando os falsos mitos e estigmas que hai arredor deste trastorno.

Tamén se enviará materiais a máis de sesenta colexios da comarca para que se vistan de azul estas semanas.

Como peche de campaña, a vindeira semana lerase un manifesto nas instalacións do Concello de Ribeira da man do socio de Amicos Juan Pombo. Estará acompañado de outros membros da entidade inclusiva, así como do alcalde de Ribeira, Manuel Ruiz, e outros concelleiros.

Na foto principal deste texto, de esqueda a dereita:

• Tomás Estévez, xerente da Asociación Boirense de Empresarios.

• Digna, vicepresidenta da Asociación Amicos.

• Gabriel Rodríguez, responsábel de comunicación da Asociación Amicos.

• Juan Pombo, usuario con autismo da Asociación Amicos.

• Primitivo Caramés, representante da Asociación de empresarios de A Pobra.

• Francisco Martínez, o presidente da Asociación de Empresarios de Ribeira.

• Xoán España, director xeral de Amicos.

Outros artigos

A Pobra recibe a bandeira azul para a praia da Lombiña-Cabío

A praia da Lombiña-Cabío é un dos areais recoñecidos coa bandeira azul pola Asociación de Educación Ambiental y del Consumidor (ADEAC) neste 2024. O acto de entrega das 140 bandeiras azuis que corresponden a Galicia -114 praias, 11 portos deportivos e 15 centros...

+

O Concello de Boiro impulsa os xogos tradicionais nas parroquias

O Concello de Boiro leva os xogos tradicionais ás parroquias mediante o programa Xogantina para fomentar o os xogos populares e inclusivos. No marco desta actividade vaise desenvolver unha xornada de actividades lúdicas tradicionais destinada aos centros de ensino e...

+

Publicidade

Revista en papel

Opinión

“Para vivir ben, Galicia!”. Luís Celeiro

“Para vivir ben, Galicia!”. Luís Celeiro

A morte, se pensas nela, se recordas ao amigo no cadaleito camiño cara ao máis alá ou seves ao teu pai deitado caladamente nun féretro de madeira nobre, diante dunha multitudede xente chorando, a morte -dicimos- fai estremecer a alma dos vivos, fai que se apague aluz...