Rianxo en Común lanza un convite á cidadanía para festexar o Entroido en Facebook e Instagram

A agrupación cidadá Rianxo en Común que coordina Julián Bustelo vén de botar a andar unha campaña para festexar o Entroido nas redes sociais e, tamén, “apoiar ao pequeno comercio e á hostalaría do municipio”. Segundo explica a plataforma, tendo en conta que a situación actual impide que “este ano se poida celebrar a festividade como a todas e todos nos gustaría”, a campaña diríxese a trasladala ás redes sociais mediante un convite a todos os veciños e veciños para subiren ao Facebook ou a Instagram unha foto vestidos de choqueiros co cancelo #choqueiradaRX.

Entre as persoas que participen na iniciativa repartiranse dous premios coa finalidade de apoiar a dous dos nosos sectores que máis están sufrindo as consecuencias das medidas adoptadas para tratar de frear o avance da COVID-19. Un dos premios consiste nun bono por valor de 100€ para gastar nos establecementos comerciais rianxeiros, mentres que o outro galardón consiste nunha cea ou comida valorada en 50€ no local de hostalaría de Rianxo que a persoa agraciada escolla.

O prazo para poder participar estará aberto ata o vindeiro domingo 14 de febreiro.