Este 28 de xaneiro comezou a funcionar en Rianxo un servizo de reparto a domicilio para axudar ao tecido hostaleiro no grave contexto de crise económica e sanitaria actual e permitir aos establecementos, aínda que sexa dunha maneira básica e limitada, proseguir coa súa actividade. Estamos a falar do servizo Rianxo na túa Porta, impulsado pola plataforma local Mercarianxo e outros establecementos e negocios locais, co obxectivo de acurtar ao máximo as distancias entre as empresas locais e os seus clientes, e facéndoo “de xeito cómodo, seguro e controlado”. A plataforma (impulsada pola Asociación Rianxeira de Empresarios -a ARE-, en colaboración co Concello) fixo balance do acadado nestes primeiros días de funcionamento do servizo, un servizo que durante a súa primeira fin de semana de vida “superou todas as expectativas iniciais”.
A ARE, en nome da propia entidade empresarial e das hostaleiras e hostaleiros, achegou o seu agradecemento á cidadanía de Rianxo polo apoio dado á iniciativa dende o comezo da actividade e “pola confianza depositada no sector e no servizo de reparto”.
A ARE engadiu que o servizo está suxeito a incorporacións, e que esta semana, de feito, adhírense á iniciativa dous novos establecementos. Ao mesmo tempo, a entidade fai un chamamento á implicación, tanto do sector como da veciñanza: “Son tempos difíciles e temos que adaptarnos a situación actual para saír canto antes adiante e volver a normalidade anterior, desfrutando dos nosos sitios de sempre en compañía”.
De feito, o servizo está a disposición das empresas locais e dos particulares quere queiran recibir deste xeito cómodo as súas compras, pedidos dun restaurante ou calquera outro recado no propio fogar.
Para contactar, as persoas interesadas poden chamar ou escribir por Whatsapp ao 633 835 911, ou ben enviar unha mensaxe ao correo electrónico rianxonatuaporta@gmail.com sen compromiso.