A xornada do luns vén marcada pola presenza de aire frío nas capas altas da atmosfera que será fonte de inestabilidade. Así, os ceos estarán parcialmente cubertos con chuvascos probables en calquera punto da Comunidade, que ocasionalmente poderán vir acompañados de sarabia e tormenta. A cota de neve situarase nas primeiras horas do día nos 1200 metros para ir en progresivo ascenso co avance da xornada. As temperaturas mínimas experimentarán un moderado ascenso, mentres que as máximas quedarán sen cambios significativos. Os ventos soprarán moderados de compoñente oeste, con intervalos fortes no litoral atlántico.
En canto o mar hai aviso amarelo este luns por ondas de catro a cinco metros nas Rías Baixas e na Costa da Morte
Meteogalicia activará ao longo do luns un aviso amarelo por ondas de catro a cinco metros de altura no mar das Rías Baixas e na Costa da Morte.
En concreto, esta situación manterase desde as 12,00 horas do mediodía do luns e prolongarase, polo menos, durante toda a xornada do martes.
Ademais, no boletín de avisos de Meteogalicia figura outro aviso amarelo por choivas, que deixarán 40 litros por metro cadrado en 12 horas ata as 6,00 da mañá en zonas do interior de Pontevedra.
No mar vento do sur á mañá, do sudoeste á tarde e do oeste á noite, forza 4 a 5 á mañá, 4 a 6 á tarde e 5 a 6 á noite. Forte marusía. Visibilidade mala á mañá e á tarde e regular á noite. Mar de fondo do noroeste á mañá e á tarde e oeste á noite, con ondas de 1.5 a 2.5 metros á mañá e á tarde e 2.5 a 3.5 metros á noite.
