A deputada da nosa comarca Rosana Pérez (A Pobra, 1964) anunciou este venres a posición do BNG respecto da modificación prevista da Lei de Saúde, que o Goberno galego prevé aprobar o día 23. Pérez comunicou o voto negativo do BNG e cualificou a adaptación de “chapuza xurídica que recorta dereitos e trata aos galegos e galegas como delincuentes”.
Rosana Pérez engadiu que “o PP emprega outra vez vellas mañas, ao presentar a modificación como proposición de lei do seu grupo parlamentar para ver de aprobar un texto legal sen contar cos preceptivos informes xurídicos sobre a legalidade do texto e procurar a aplicación inmediata”.
A lei, dixo a deputada, “pretende aplicar medidas do Estado de alarma cando non se dea esa condición, e sen autorización xudicial”. Tamén fixo saber que o texto “abunda no uso de termos como sancións (máis de setenta veces), de ata 600.000€, restricións ou recortes”.
Rosana Pérez sinala que entre as medidas inclúese “a incautación ou inmobilización de recursos, a obrigatoriedade de facilitar datos persoais, o encerro en hospitais ou domicilios a quen sospeiten enfermo, o sometemento a tratamento médico mesmo sen autorización expresa, e a obrigatoriedade das vacinas, ao que nin a OMS se atreveu”.
Pola contra, afirmou Rosana Pérez, “a nova lei non reforza a sanidade pública, non mellora a atención primaria, auténtica porta principal do sistema de saúde, non aumenta o número de rastrexadores nin do persoal sanitario, sexan médicos, enfermeiros, etc., nin recolle medidas para reducir as listas de agarda”.
