A conselleira do Mar estivo este 16 de febreiro en Vilagarcía, dando detalles das axudas que vai destinar o Goberno galego ao sector do marisqueo. Segundo fixo saber, trátase de dous millóns de euros que se encamiñarán a proxectos de mellora das zonas de produción e, tamén, a iniciativas para protexer os ecosistemas. Estes recursos mobilizados, dixo, son un medio fundamental para “paliar os efectos de episodios como os temporais rexistrados nas últimas semanas”.
En concreto, trátase de tres liñas de axudas que veñen de saír publicadas no DOG a comezos de mes e que contan cun orzamento global de preto de 2,3 millóns de euros para actuacións como as sementeiras de bivalvos co obxectivo de mellorar a produtividade dos areais.
A titular de Mar subliñou que estes apoios poden destinarse a “proxectos que mitiguen o impacto das condicións meteorolóxicas adversas das últimas semanas (que provocaron certa mortalidade nos bancos e debilitaron o marisco como consecuencia do seu desprazamento das zonas nas que estaba asentado así como pola baixa salinidade da auga)” e incidiu en que, unha vez se coñezan con exactitude os efectos destes episodios, “podería incrementarse o crédito destas achegas ou habilitar apoios adicionais para o sector”.
A representante do Executivo galego lembrou que o sector marisqueiro galego foi un dos que máis sufriron o impacto da crise derivada da alerta sanitaria polo coronavirus en 2020 e lamentou que agora se sumen os efectos negativos das inclemencias meteorolóxicas. Por iso, salientou que a “Xunta apoiará ao sector, como xa fixo o ano pasado, para que supere as dificultades ao tratarse dunha actividade esencial, que ten futuro e da que dependen milleiros de familias galegas”.
