O Concello de Rianxo, a través do departamento de Obras e Servizos Municipais, compartiu nas redes diversas actuacións que se están a desenvolver no termo municipal para o acondicionamento de inmóbeis, infraestruturas ou espazos naturais.
Entre os elementos onde se estivo a traballar para a súa posta a punto atópanse as marquesiñas das paradas de autobús de Outeiro (O Araño) e Corques (Taragoña), onde se procedeu á reposición dos cristais; ou as contornas das fontes de Outeiro e Barral, que foron limpadas e acondicionadas para o seu uso por parte da veciñanza.
Asemade, desenvolvéronse traballos de poda no patio do Colexio Castelao e leváronse a cabo traballos, en colaboración coas veciñas e veciños, para ampliar a rede municipal de auga na zona de Taragoña.
