O departamento de Obras e Servizos Municipais de Rianxo proseguiu os días pasados co seu plan de traballo para acondicionar, mellorar e humanizar infraestruturas, estradas, contornas de lecer e puntos de interese histórico, social e cultural. Desta volta tocoulle a diferentes enclaves da parroquia de Araño. Por exemplo a capela de San Xoán na Hermida, que foi limpada a fondo para o desfrute da veciñanza e para favorecer, tamén, a accesibilidade. Rozouse e púxose a punto a contorna máis próxima ao templo e tamén a área de lecer lindeira.
Dende Obras e Servizos Municipais tamén anunciaron que este mes rematarán os traballos de saneamento en Foxacos (O Araño) que dará servizo a 37 vivendas. Trátase dunha obra financiada pola Deputación da Coruña cun orzamento próximo ós 150 mil euros. Unha vez concluída esta obra, o Concello licitará a primeira fase do saneamento no lugar de Burés; en palabras do alcalde Adolfo Muíños “un paso máis no camiño cara o saneamento integral do municipio”.
Sen saírnos do Araño, o Goberno local tamén fixo saber que procedeu á reposición dos cristais da marquesiña de Outeiro, á que se engadiu o acondicionamento da marquesiña de Corques, en Taragoña, e máis a limpeza das fontes de Outeiro e Barral.
