A Policía Local de Rianxo compartiu o seu balance de actividade das dúas últimas semanas (entre o 8 e 21 de febreiro), poñendo o foco nas accións destinadas a velar polo cumprimento das medidas para frear o avance da COVID-19 no concello e máis na comarca. Estas iniciativas incluíron controis estáticos e dinámicos de control do peche perimetral do concello, ademais de vixilancias concretas e inspeccións en zonas comerciais e de gran afluencia de persoas.
Tamén abrangueron a posta en marcha dunha campaña especial de seguridade viaria despregada en coordinación coa Dirección Xeral de Tráfico, dando acubillo a controis de velocidade, alcoholemia e drogas en diversos puntos da rede viaria do termo municipal.
En total, verificáronse 3.011 vehículos.
Froito dos controis e inspeccións efectuadas cumprimentáronse no dito período 17 actas de proposta de sanción en materia de sanidade e medidas anti-COVID ademais de detectarse 95 infraccións de tráfico, 29 delas por excesos de velocidade e 2 por conducir con presencia de drogas no organismo.
Asemade, procedeuse á investigación xudicial de 3 condutores por delitos contra a seguridade viaria, 2 deles por perda de vixencia do permiso de condución por perda total de puntos e 1 por exceso de velocidade ao ser detectado conducindo a 129 km/h nunha vía urbana limitada a 50. Os condutores, unha vez instruídas as pertinentes dilixencias foron postos a disposición do Xulgado de Garda de Padrón.
Dende o 25 de outubro, o corpo policial rianxeiro efectuou 161 propostas de sanción en materia sanitaria e a sala operativa dos axentes deu resposta a 1.748 chamadas de cidadáns requirindo diversas informacións por normativa COVID.
