Este mércores iniciouse no Consistorio de Ribeira unha rolda de encontros de traballo para informar aos concellos galegos da aplicación das Directrices da Paisaxe, que o vindeiro 20 de febreiro entrarán en vigor. Na sesión participou o director do Instituto de Estudos do Territorio, Francisco Barea, e máis os responsábeis dos concellos de Ribeira e Porto do Son (tamén estaban convocados os de Boiro e A Pobra de Caramiñal, pero non puideron asistir por circunstancias persoais).
Segundo recordou Barea, as ditas disposicións medioambientais e urbanísticas, as primeiras coas que conta a Comunidade galega que determinan polo miúdo os pasos a seguir en materia de riqueza ambiental e estética do territorio, están pensadas como “unha ferramenta de protección, xestión e conservación da paisaxe, coa que Galicia afiance a súa actual posición entre as comunidades máis avanzadas en materia paisaxística”.
O director do IET defendeu este tipo de encontros porque “é moi importante que se coñeza o seu contido, por canto recolle normas e directrices que deberán integrarse na totalidade de iniciativas que se promovan no territorio galego, coa finalidade de preserva e coidar os valores paisaxísticos”.
