A Federación de Sanidade de CCOO de Santiago e Barbanza denunciou a metodoloxía seguida polo programa vacinación autonómico en relación aos centros sanitarios privados e concertados de saúde mental, xa que segundo a instrución 4/21 da Xerencia do SERGAS, esta faríase entre os días 11 e 21 de febreiro.
Dende que comezou a pandemia, explican dende o sindicato, “o persoal sanitario fixo o posíbel por mellorar a vida das persoas que se encontraban nos centros sanitarios privados e concertados de saúde mental, pero este sector aínda se considera de segunda división”. Así, o delegado de CCOO, Ramón Pazos, sinala que “as persoas con patoloxías psiquiátricas vense dobremente castigadas pola súa doenza e mais polo esquecemento da Administración, que ten a obriga de velar pola súa saúde”. Doutra banda, o voceiro de CCOO expón que “xa lle remitiron ao Sergas solicitudes de vacinación e listaxes de persoal traballador e doentes”, pero polo momento non houbo resposta ningunha.
