O Congreso da Unión Comarcal de UGT de Compostela e Barbanza celebrado baixo o lema Traballando en igualdade elixiu nova executiva. Esta está encabezada agora por María Luisa Rodríguez Vázquez, que substitúe a Inma Sieiro. A nova comisión executiva comarcal ficou ratificada polo 96% dos votos emitidos. O secretario xeral de UGT-Galicia, José Antonio Gómez, presente na sesión, salientou o traballo feito por Inma Sieiro.
O equipo responsábel da unión comarcal quedaría deste xeito:
· Secretaria Xeral: María Luisa Rodríguez Vázquez
· Secretaria de Organización e Administración: Ana Reboredo Piedra
· Secretario de Formación, Emprego e Saúde Laboral: Ricardo Turnes Mejuto
· Secretario de Política Sindical: Ángel Fernández Pintor
· Secretaria de Políticas Sociais e Igualdade: María Jesús Campos Varela
Como dixemos no congreso recoñeceuse o labor desenvolvido pola anterior comisión executiva durante este mandato, aprobando a súa xestión co 100 por cento dos votos.
Na apertura da sesión interviron o presidente da Fundación Luis Tilve, Benito Núñez, Ángel Iglesias, secretario xeral de UGT-A Coruña e Cee, a secretaria xeral de FeSPp-UGT de Galicia, Delia Irene Martínez e Javier Carreiro, secretario xeral de UGT-FICA de Galicia.
Todas e todos eles coincidiron en subliñar a figura da secretaria xeral saínte, Inma Sieiro, e destacaron que este tempo de pandemia “serviu para aprender moitas cousas, entre outras que nos temos que sentir moi orgullosos do traballo desenvolvido polas organizacións sindicais durante toda a pandemia, atendendo e dando cobertura á clase traballadora e desenvolvendo un servizo esencial para o conxunto da sociedade”.
Tamén se puxo de relevo “o papel desenvolvido polos sanitarios e por todos aqueles que estiveron en primeira liña nesta crise sanitaria coidándonos, protexéndonos e alimentándonos”.
Durante a súa intervención na clausura, o secretario xeral de UGT-Galicia, José Antonio Gómez, afirmou que “a pandemia serviu para achegar aínda máis o sindicato aos traballadores e traballadoras. O sindicato estivo á altura, o obxectivo principal era o de protexer a saúde, pero tamén protexer or emprego e as empresas”.
Finalmente, a secretaria xeral entrante de UGT-Compostela e Barbanza agradeceu o apoio recibido e tamén os anos de dedicación ao sindicato de Inma Sieiro, animando aos presentes a seguir “este exemplo de implicación e traballar en igualdade, seguindo o lema deste congreso, na defensa dos
dereitos dos traballadores e traballadoras”.
