A Casa Consistorial de Boiro ficará pechada dende este 9 de febreiro e ata que a situación sanitaria mellore. Esta decisión foi tomada polo Goberno local tras coñecerse o caso de dous positivos nela. Con todo, os servizos urxentes seguirán funcionando de maneira telemática ou telefónica.
Os contactos estreitos destes casos foron chamados para realizar unha proba de antíxenos cando se coñeceron os positivos. Polo momento, deron todos negativo. Ademais, o persoal que mantivo contacto cos positivos nos últimos días está a facer un cribado de probas PCR, co fin de descartar novos contaxios.
