A Xunta de Galicia publicou o cuarto número das Guías DXT Galego baixo o lema Volvendo con sentidiño. O manual xa chegou a tódolos clubs e federacións deportivas de Galicia e poderá ser consultado por calquera persoa interesada na páxina web do Deporte Galego.
Por un lado, a Xunta pretende “achegarse do modo máis seguro posible á volta á competición de nenos, mozos e amateurs”. A guía expón orientacións, suxestións e algúns instrumentos que poden servir para que os educadores e adestradores poidan optimizar a reactivación da competición con seguridade sanitaria. Entre estas medidas, ademais das xa coñecidas (distancia de seguridade, máscara e mans desinfectadas), pódese estimar o grao de exposición ao risco (baixo, medio ou alto) de cada tarefa, para axustar e vixiar con maior precisión a práctica real. Deste xeito, sinala o Goberno galego, acádase “gran motivación, reforzo e recompensa para o deportista”, o que aínda potenciarase máis cando a práctica inclúa xa a propia actividade deportiva.
Esta guía, desenvolvida por expertos das tres universidades galegas en colaboración con especialistas de outras universidades españolas e europeas, é a cuarta dunha serie que completa o documento único que contribuirá a reactivar os adestramentos e competicións dos deportes. A primeira delas trata as Recomendacións para a aceleración da reactivación e readaptación técnico/táctica do deportista para a súa motivación e progresiva para as esixencias da competición. A segunda, sobre Recomendacións para a aceleración da reactivación e readaptación técnico/táctica do deportista para a súa motivación e achegamento progresivo ás esixencias do partido. E a terceira trata a Aceleración da reactivación e readaptación técnico táctica do deportista para motivalo e achegalo progresivamente ás demandas da loita, combate, etc.
Por último, o secretario xeral para o Deporte, José Ramón Lete Lasa destacou o comportamento “escrupuloso” durante os tres meses que tivo a vixencia o estado de alarma en Galicia e que “a Xunta entende que neste momento, garantir a seguridade e a saúde da nosa poboación tamén pasa por recuperar a actividade deportiva”.