As Súas Maxestades de Oriente visitaron as aldeas de Dodro

As Súas Maxestades os Reis Magos de Oriente e o Concello de Dodro traballaron este martes conxuntamente para realizar unha visita segura e controlada a todas as nenas e nenos do termo municipal. En total, visitaron por vez primeira as 24 aldeas de Dodro, achegando ilusión e alegría a nenas, nenos e maiores. Os Reis, que cumpriron con todas as normas anti-COVID, agardarán até a noite pecha para repartir os agasallos polas aldeas de Dodro.

Durante o percorrido, no que participaron tres vehículos do Concello e dúas unidades móbiles de Protección Civil, a xente participou gardando as distancias e saíndo ás portas da súas casas. A caravana dos magos non parou nin tivo contacto cos pequenos e pequenas.

A Caravana dos Magos foi organizada polas Concellerías de Cultura e Patrimonio, e Xuventude e Igualdade do Concello de Dodro.