Os populares da provincia propoñen un fondo de cooperación para o rescate do sector hostaleiro

O grupo do Partido Popular na Deputación de A Coruña levará ao pleno que se celebrará este venres unha moción na que reclama ao Goberno provincial o seu compromiso, xunto co resto de administracións públicas de Galicia, para a creación dun Fondo de Cooperación Galego COVID-19, co obxectivo, segundo especifican os populares, de “rescatar ao sector hostaleiro de toda a comunidade autónoma e, en concreto, ao da provincia da Coruña”.

Dende o grupo popular subliñan que “a hostalería é un dos sectores nos que maior impacto teñen as restricións sanitarias implantadas para a contención da pandemia da COVID-19”, e recordan que é “un sector que abrangue a preto de 20.700 establecementos en Galicia, a maior parte pequenas e medianas empresas que son fonte de subsistencia de moitas familias galegas”. Por este motivo, esixen unha resposta institucional “contundente e integral” por parte das distintas administracións públicas (Goberno central, Xunta de Galicia, deputacións e concellos) que “contribúa a apoiar a supervivencia dos establecementos”.

Segundo apuntou o viceportavoz popular, Evaristo Ben, “o momento actual que estamos a vivir demanda levar a cabo máis medidas e considerando que as achegas nos vindeiros meses deberán continuarse dada a evolución da situación sanitaria, temos a convicción de que é necesario a creación do Fondo de Cooperación COVID-19, seguindo o modelo que xa se implantou na comunidade autónoma de Valencia”. Ben engadiu que neste fondo a Xunta de Galicia achegaría o 50% da contía económica, a Deputación da Coruña o 30% e os concellos o 20% restante.