Os 17 tripulantes do pesqueiro galego Génesis, pertencente á compañía ribeirense Basoñas Mar, foron rescatados este xoves por vía aérea despois de que o buque embarrancase na zona de Old Man of Hoy, nas illas Orcadas, ao norte de Escocia.
Segundo informou a Axencia Marítima e de Gardacostas do Reino Unido, o pesqueiro emitiu un sinal de socorro pouco despois das 7.30 horas, tras bater contra unhas rochas.
No dispositivo de rescate participaron helicópteros dos servizos de Gardacostas de Sumburgh e Stornoway, un bote salvavidas de Stromness RNLI (Royal National Lifeboat Institution), equipos terrestres de Kirkwall e St Margaret’s Hope e un avión de patrulla da Royal Air Force.
Tamén interveu o Hamnavoe, un transbordador de pasaxeiros que se desviou da súa ruta para prestar asistencia.
As condicións meteorolóxicas e a localización do pesqueiro, xunto a unha zona rochosa próxima a un cantil, impediron realizar o rescate por mar. Os 17 tripulantes foron evacuados por vía aérea por un helicóptero de Stornoway e trasladados posteriormente a Kirkwall.
A Axencia Marítima e de Gardacostas británica confirmou que non se notificaron feridos entre os tripulantes.
