A Área Sanitaria de Santiago de Compostela e Barbanza iniciou hoxe a vacinación fronte a Covid-19 aos profesionais dos centros sanitarios.
Desde esta mañá os profesionais sanitarios e non sanitarios están citados a través dun SMS coa hora e o lugar de vacinación xeoreferenciado, seguindo os criterios de priorización fixados no documento Estratexia de Vacinación fronte á Covid-19 en España acordado no marco do Consello Interterritorial do Sistema Nacional de Saúde.
Así, nesta primeira fase de vacinación, que se desenvolverá desde hoxe mércores ata o venres serán citados uns 3.300 profesionais. Citarase a todos os profesionais de atención primaria as cabeceiras de servizo, onde se sitúan os PAC, e aos traballadores hospitalarios que están en primeira liña de atención a doentes no Hospital Clínico e no Hospital de Barbanza.
Son 10 equipos de enfermería os encargados de administrar a vacina.
Os puntos nos que se vacina hoxe son Hospital Clínico de Santiago, Concepción Arenal, Vite, PAC de Santiago, Bertamiráns, Fontiñas, Padrón, Valga e A Estrada, nos que se están a vacinar máis de mil douscentos profesionais.
