O Concello de Dodro está a traballar para corrixir os erros en materia toponímico-lingüística que poida haber na documentación que sobre o termo municipal atesouran diferentes entidades. Co comezo do ano, o Concello púxose en contacto coa Dirección Xeral de Mobilidade da Xunta de Galicia para facerlle ver que das oito paradas de autobús que existen en Dodro, catro delas están mal nomeadas e con erros.
A relación inclúe os seguintes casos de erros toponímicos.
· Lestrobe. Está nomeada como “Lestrove” e en algún lugar como “Lestrove (Padrón)”. O Concello lembra que a dita localidade pertence ao termo municipal de Dodro.
· Muronovo. O núcleo figura nomeado erroneamente como “Muro Novo”.
· Bexo. Figura na información da Dirección Xeral co topónimo errado de “Vexo”.
· Mesón de Bexo. Figura como “Mesón de Vexo”.
No escrito o Goberno local pide que se corrixan estes problemas lexicográficos e acompaña, para aclarar conceptos, o nomenclátor oficial. A resposta da Dirección Xeral de Mobilidade foi positiva, facendo saber que se fará unha revisión urxente das denominacións pero “que nas actuacións de certa complexidade, ao xa estar os servizos en funcionamento, a corrección non poderá ser inmediata, aínda que se tentará facer o antes posible”.
