Dodro entrega o XXXVIII Premio de Poesía Eusebio Lorenzo Baleirón a Inés Mosquera Calvo
O Concello de Dodro celebrou este sábado no CPI Eusebio Lorenzo Baleirón o acto de entrega do XXXVIII Premio de Poesía Eusebio Lorenzo Baleirón, que nesta edición recaeu na obra “Upupú”, da poeta Inés Mosquera Calvo. O certame fora convocado polo Concello e coordinado pola poeta Silvia Penas.
A obra resultou escollida no mes de novembro entre un total de corenta e dúas candidatas. O xurado estivo composto polas poetas María Lado Lariño, Noelia Gómez Calvo e Miguel Cavadas Docampo, ademais do alcalde de Dodro e do concelleiro de Cultura.
Na acta, o tribunal destacou a presenza do paxaro Upupú como fío simbólico do poemario, que “soa ao longo dos poemas como unha oración” e se impón sobre a dor, a enfermidade e a vergonza. A obra está dividida en cinco partes e acompáñase de citas doutros autores, na súa maioría mulleres, que reforzan o seu percorrido poético.
Inés Mosquera Calvo naceu en Carcacía, Padrón, en 1992. É graduada en Educación Primaria con especialización na docencia de linguas estranxeiras e conta cun máster en Lingüística Aplicada pola Universidade de Vigo. Na actualidade traballa como tradutora.
A autora iniciou a súa traxectoria poética en 2022 coa publicación de Papulas Amarelas, a través de Medulia Editorial, e ao ano seguinte apareceu o seu segundo libro, Nonmesquezas. Ademais, participou en publicacións colectivas como Dorna e Domingo das Mozas.
No acto participaron a coordinadora do certame, Silvia Penas; a autora premiada; Manuel Martínez, en representación da editorial Chan da Pólvora; o alcalde de Dodro, Xabier Castro; e o concelleiro de Cultura, Ramón Abuín.
