Este luns 1 de xuño celebrouse na sede da Federación Galega de Comercio o sorteo dos premios correspondentes ás dúas campañas de Merca no teu comercio que se desenvolveron na provincia de A Coruña entre o 15 e o 30 de maio. Esta iniciativa de dinamización do comercio de proximidade repartirá nesta ocasión 1.000 euros en premios en Narón e Fene; e a mesma cantidade en Padrón, Rois e Dodro.
Esta campaña está organizada pola Federación de Comercio de A Coruña, a Federación Galega de Comercio e a Xunta de Galicia, coa colaboración neste caso da Asociación de Comerciantes de Narón, a Asociación de Empresarios Cruceiro de Fene e outras entidades. O obxectivo principal é estimular as vendas nos municipios rurais da provincia de A Coruña, achegar aos clientes aos comercios e dinamizar o sector.
A participación nesta iniciativa foi moi satisfactoria, rexistrándose un total de 3.725 tickets nas localidades Narón e Fene; e 1.022 tíckets nas localidades de Padrón, Rois e Dodro, pertencentes a compras realizadas nestas localidades coruñesas.
Hoxe sorteáronse en cada unha destas campañas 1.000 euros, repartidos en 20 tarxetas prepago de 50 euros. Os actos de entrega de premios terán lugar o venres, 5 de xuño, ás 13.30 horas, na praza da Gándara de Narón, no primeiro caso. E o mércores, 10 de xuño, ás 13.30 hs na praza Macías de Padrón, no segundo caso. Os gañadores deberán empregar o seu premios en compras no comercio retallista das localidades onde se realizou a campaña. O listado completo pode consultarse en mercanoteucomercio.com.
