A Asociación de Veciños de San Xoán de Laiño celebrará o vindeiro sábado 6 de xuño a XXXV edición da Romaría do Avelán (Dodro), unha cita xa consolidada no calendario festivo e cultural da comarca que volverá combinar tradición, música popular, gastronomía e participación veciñal. Entre as novidades máis destacadas desta edición atópase a celebración do I Mercado de Artesanía Local, que abrirá as súas portas ás 12:00 horas no entorno do Avelán.
Segundo explicaron dende a organización, “a iniciativa nace co obxectivo de poñer en valor o traballo de artesáns e creadoras da contorna, ofrecendo un espazo de encontro entre o público e os oficios tradicionais, así como produtos feitos á man vinculados á identidade cultural galega”.
A organización destaca que esta mostra pretende converterse nun dos grandes atractivos da romaría, contribuíndo á dinamización cultural e económica do rural e fomentando o apoio ao comercio e á produción de proximidade. O mercado permitirá ás persoas asistentes descubrir pezas únicas de artesanía, coñecer de primeira man os procesos de elaboración e gozar dun ambiente festivo e familiar.
A programación da Romaría do Avelán completarase coa tradicional procesión ata a Cruz do Avelán, a misa de campaña na honra á Santa Cruz, o xantar campestre e distintas actuacións musicais ao longo do día, entre elas o combate de charangas cos grupos Gremio de Mareantes e Vai Rañala Meu.
Desde a Asociación de Veciños de San Xoán de Laiño animan á veciñanza e visitantes a participar nesta celebración, que busca manter vivas as tradicións populares e fortalecer os lazos comunitarios arredor dunha das festas máis emblemáticas da parroquia.
A AA.VV. de San Xoán de Laíño é un colectivo veciñal comprometido coa cultura, a lingua e o benestar da comunidade dende 1990.
