O parte COVID deste venres na nosa comarca é un parte desigual: positivo para algúns concellos, máis preocupante para outros. No lado esperanzador caen Ribeira, Boiro e Porto do Son, que foron quen de mellorar os datos de incidencia e novos contaxios, confirmándose como os únicos concellos da nosa comarca que lograron mellorar as súas cifras e reducir un algo o número de enfermos.
Pola contra, no resto dos municipios o volume de novos doentes da COVID-19 incrementouse cunha vintena de casos acabados de notificarse, repartidos por todos os termos municipais. Son, con probabilidade, as consecuencias das reunións mantidas a comezos do Nadal, que se ben foron establecidas de xeito responsábel por boa parte da poboación, non resultaron ser suficientemente seguras noutras casos.
No lado máis preocupante atópase Outes, que engade de súpeto cinco enfermos até poñerse nos 38, e cunha incidencia acumulada de 617 (casos por cada 100.000 habitantes). A de Outes é a taxa máis alta da nosa contorna. Pola súa banda, Rianxo sumou tres doentes máis até poñerse nos 50. Os concellos da Pobra e Lousame tamén sumaron dous casos cada un (39 e 15, respectivamente).