Adiantado o toque de queda ás 22.00 horas. Sanidade impón as máximas restricións a Ribeira, A Pobra, Boiro, Rianxo, O Son, Noia e Outes

A Xunta adianta o toque de queda ás 22.00 horas e cinco de cada dez galegos estará desde este venres baixo o máximo nivel de restricións, o que supón que en 60 concellos haberá peche perimetral por separado e que a hostalería permanecerá pechada no interior e só poderán abrir as terrazas ata as 18.00 horas.

Na comarca Sanidade impón as máximas restricións a Ribeira, A Pobra, Boiro, Rianxo, O Son, Noia e Outes.

O presidente da Xunta, Alberto Núñez Feijoo, anunciou as novas restricións acordardas onte á noite polo comité clínico que asesora a Sanidade

O resto do país estará no nivel medio-alto, coa hostalería pechando ás 18.00 horas, permitindo o 30 % do aforo interior e o 50 % en terrazas, aínda que non haberá peche perimetral para estes concellos salvo no caso de Vigo, Lugo e Pontevedra.
As medidas chegan nun día no que se alcanzou o récord de contaxios diarios desde o inicio da pandemia con máis dun milleiro de infectados nas últimas 24 horas e preto de pasar a barreira dos 10.000 casos activos.

MEDIDAS EXTRAORDINARIAS PARA 60 CONCELLOS

-Mobilidade limitada a cada concello, quedan eliminadas as améndoas ou agrupacións de municipios. -Hostalería sen servizo no interior, só permítese atención nas terrazas ata as 18.00 horas. -Aforo nos centros comerciais do 30 %. -Os establecementos de xogo non poderán abrir as súas portas

MEDIDAS DECRETADAS A PARTIR DO VENRES

-O toque de queda adiántase ás 22.00 horas. -A hostalería pechará ás 18.00 horas. -O peche dos comercios adiántase ás 21.30 horas. -Reunións públicas e privadas limitadas a catro persoas. -As visitas hospitalarias circunscríbense a unha persoa por paciente salvo casos excepcionais. -Os concellos pasan a dous niveis: o medio-alto e o máximo. No medio-alto non se establece peche perimetral, pero Lugo, Vigo e Pontevedra son a excepción e queda restrinxida a mobilidade só ao concello, salvo para os casos xustificados: laboral, académico e de asistencia.